پاک فوج نے گلگت بلتستان میں برفباری سے بند ہونے والے برزل پاس کو ٹریفک کیلئے کھول دیا ، آپریشن کی قیادت کرنے والے کیپٹن اصمد ، ایک فوجی جوان اور مشین آپریٹر جام شہادت نوش کر گئے ۔
آئی ایس پی آر کے مطابق 2 اور 3 جنوری کی درمیانی شب برزل پاس کو کھولنے کیلئے بھاری مشینری کے ذریعے برف ہٹانے کی کارروائی کی گئی تاکہ علاقےمیں مسلح افواج کی آپریشنل نقل و حرکت کو ممکن بنایا جا سکے ، اچانک برفانی تودہ گرنے سے آپریشن کی قیادت کرنے والے کیپٹن اصمد ، دو جوانوں اور پی ڈبلیو ڈی کا ایک مشین آپریٹر برف تلے دب گئے ۔ شدید کوششوں کے بعد چاروں افراد کو برف سے نکال لیا گیا ، تاہم کیپٹن اصمد ، سپاہی رضوان اور مشین آپریٹر عیسیٰ جامِ شہادت نوش کر گئے ۔ عسکری ترجمان کا کہنا ہے کہ کیپٹن اصمد اور ان کے 2 ساتھیوں نے انتہائی خراب موسمی حالات میں نہایت مشکل آپریشن کے دوران اپنی جانوں کا نذرانہ پیش کیا ۔ ان کی قربانی اس امر کی گواہی ہے کہ افواج پاکستان کے افسر اور جوان مادرِ وطن کے دفاع کے لئے پرعزم ہیں ۔
وزیراعظم شہباز شریف
وزیراعظم شہباز شریف نے کیپٹن اصمد، سپاہی رضوان اور مشین آپریٹر عیسیٰ کو خراج عقیدت پیش کیاہے ۔ وزیراعظم نے شہداء کے درجات کی درجات کیلئے دعا کی اور شہداء کے اہل خانہ سے اظہار تعزیت کیا۔
ان کا کہناتھا کہ شہداء نے جان کی پرواہ نہ کرتے ہوئے برزل پاس کھولنے کا کام جاری رکھا، آمدورفت یقینی بنانے میں کردار ادا کرنے پر قوم شہداء کو سلام پیش کرتی ہے۔
وزیر داخلہ محسن نقوی
وفاقی وزیر داخلہ نے برفانی تودے میں دب کر شہید افسر و جوانوں کو خراج عقیدت پیش کیاہے ۔ ان کا کہناتھا کہ کیپٹن اصمد،سپاہی رضوان اور مشین آپریٹر عیسی کی قربانی کو سلام پیش کرتے ہیں۔ وزیر داخلہ محسن نقوی نے شہداء کے لواحقین سے دلی ہمدردی اور اظہار تعزیت کیا ۔
محسن نقوی کا کہناتھا کہ فرائض کی بجا آوری کے دوران افسر و جوانوں نے شہادت کا بلند رتبہ پایا، شہید اہلکار قوم کے ہیرو ہیں، شہداء کی قربانی کو ہمیشہ یاد رکھا جائے گا۔
کیپٹن اصمد،سپاہی رضوان اور مشین آپریٹر عیسی برزل پاس پر برف ہٹاتے ہوئے شہید ہوئے۔
